Gising na, aking bayan

GISING NA, AKING BAYAN
Akda ni: Ka Tony Miranda, BMP-ST


Minsan tayong mga Pilipino ay nagmamaang-maangan
Kung bakit ko sinabi ito, sadyang nararanasan sa kasalukuyan,
Tayo’y inaapi na sa sariling bayan,
Na nagpapakasasa ng yaman ang mga kapitalista’t mga dayuhan...

Tayong mga pilipino ay di na raw talaga matuto,
Madami nga sa atin ay may talino at kaalaman
Ngunit lalo lang nadadala sa burges na kaisipan,
Ng mga kapitalista’t mga dayuhan...

Taong bayan ay kanyang pinagsasamantalahan,
Madami na nga akong nakasalamuha sa aking bayan
Ngunit, dahil sa kahirapan sila’y nagkikibit balikat na lamang
Kaya mga kapitalista at mga dayuhan ay nagiging gahaman.....

Sadya ba talagang ganyan na ang sa kasalukuyan
Naghahantay na lamang yurakan ang dangal at pagsamantalahan,
Maghahantay na lamang ba tayo na agawin
Ang kabang yaman sa lupang ating tinubuan

Ng mga naghaharing uri sa ating lipunan...
Ito ba ang kasagutan sa kahirapan na nararanasan,
Na unti-unti ng inaagaw ang lupain na minana pa natin sa ating mga ninuno
Na kapag lumaban ka, ipapadukot o ipapatay ka ng gobyerno

Minsan tuloy naiisip ko, Pilipino nga ba ang nakatira sa ating bayan?
Oh, sadya talagang nalunod na tayo o nadala na ang ating kaisipan ng mga dayuhan
Ilang buhay pa ba ang ibubuwis para lang makamit ang tunay na pagbabago?
Ng ilang lider na walang hangad kundi ang kapakanan ng taong bayan...

Dapat na tayong matuto aking mga kababayan.,
Mga kapitalista, trapo at mga dayuhan na naninirahan na,
At sila lang ang nagpapakasasa sa ating mga pinagpaguran
Na walang ibang hangad kundi magkamal ng limpak-limpak na tubo lamang..

Kaya itanim natin sa isipan, sa buong sambayanan,
Na mga kapitalista, trapo at mga dayuhan ay salot sa ating lipunan...
Kaya tayo ng lumaban! Laban sa mga naghaharing uri sa lipunan!
Itayo natin ang tunay na pagbabago! Itayo ang gobyernong makamasa!

Desperada

DESPERADA
Akda ni: Ka Tony Miranda, BMP-ST

Minsan mahirap paniwalaan,ngunit sadyang totoong nararanasan
Na kung titignan mo ay nagiging desperada ang isang babae,
Na kung ikaw ay magbabasa lamang ng mga pahayagan,
Na kahit ano na lang ang ginagawang papogi sa bayan.....

Madaming klaseng trabaho ang iniaalok sa mga tao,
Ngunit sa dami ng nawalan ng trabaho,ilan lang kwalipikado...
Ito ba ang sinasabi ng gobyerno na pang-agdaw-gutom sa mamamayan
Ano ba talaga ang kanyang plano sa sambayanang Pilipino?

Sobra na ang kanyang ginagawa sa taong bayan,
Ngunit gumagawa talaga ng iba’t ibang pamamaraan,
Maging marahas man o pumatay ng tao na tingin niya ay kalaban
Para lamang mapagtakpan ang kanyang mga kasinungalingan.....

Tulad ng mga nakaraang araw,habang mahimbing na natutulog ang taong bayan
Nagsagawa ng isang lihim na pagpupulong ang mga "KAWATAN"
Na ipinasa nila (con-ass) na walang abiso sa senado at sambayanan,
Isang pambabalasubas at pambabastos nito sa ating mamamayan

Tulad din ng isinusulong na cha-cha ng mga kongresista,
Ito ay pagpapalawig lang ng termino ni gloria…
Upang manatili lamang sa panunungkulan,kaya tuwang-tuwa itong kapitalista
Upang habang buhay na pagsamantalahan ang taong bayan o buong bansa...

DESPERADA na talaga si GLORIA,
Dahil sa samo’t saring problemang ibinabato sa kanya
Ng mga kritiko at sambayanang Pilipino,
Hindi lang ”DEPERADA”, naluluka na talaga ang ating Pangulo...

Kikilos pa ba tayo? O hahayaan na lang ba natin?
Na maghari ang mga nanunungkulan sa ating GOBYERNO,
At nag-aagawan sa puwesto,dahil sa iisa ang interes
Ng mga DAYUHAN,KAPITALISTA at mga TRAPO...

Malulutas ba nito ang malalim na problema sa kahirapan ng ating bayan,
Ekonomiya,Pulitika,Kultura at Relasyong panlabas,
Kaya’t labanan natin,patatagin at palakihin ang puwersa!
Itayo ang gobyerno na makamasa!