Usapan ng Magkaibigan

USAPAN NG MAGKAIBIGAN
ni Gregorio V. Bituin Jr.
15 pantig bawat taludtod

"gaano ba katatag sa laban ang manggagawa?"
"bakit mo ba tinatanong, wala ka bang tiwala?"
"natanong ko lang dahil nangyayari'y parang wala
tila baga tunggalian ng uri'y humuhupa"

"mayorya ang manggagawa kaysa kapitalista
ano't manggagawa'y nagpapaapi sa kanila
uring kapitalista ba'y di nila kinakaya
kaya paano naging matatag ang gaya nila?"

"hangga't naririyan ang pribadong pagmamay-ari
pagsasamantala sa obrero'y nananatili
kaya di pa humupa ang tunggalian ng uri
makiramdam ka't tunggaliang ito'y sumisidhi"

"ngunit bakit sa krisis ng bansa'y walang magawa
matatag nga ba sila, o sila'y natutulala?"
"pagtiwalaan mo sana ang uring manggagawa
mapapatid din ang kinalawang nang tanikala"

"kaibigan, nararapat yatang mamulat na nga
sa pagpapalaya ng uri silang manggagawa
hawakan nila ang maso, pader man ang mabangga
pag kumilos na, kapitalista'y matutulala"

"ngunit kailan sila magkakaisang tuluyan"
"kung mamumulat sila sa kanilang kalagayan
dapat pag-aralan nilang mabuti ang lipunan
upang sistemang bulok na'y mabaon sa libingan"

"hangga't mababa ang kamulatan ng manggagawa
sa kanilang papel bilang hukbong mapagpalaya
nabubulok na sistema'y di nila magigiba
pagkamulat nila'y susi kanilang paglaya"

"sana'y hindi hanggang teorya lang iyan, kaibigan"
"naganap na ito, magbasa ka ng kasaysayan
ang Komyun ng Paris, pati na Rusong himagsikan
na pinamunuan ni Lenin, iyong pag-aralan"

"kaya patuloy tayong mag-aral, magbasa-basa
upang mapag-aralan ang tamang estratehiya
upang uring manggagawa'y tuluyang magkaisa
at ang pagpapalaya ng uri'y maging ganap na"

"halina't organisahin ang manggagawa ngayon
upang bulok na sistema'y kanila nang ibaon
sa kangkungan ng kasaysayan tungong rebolusyon
upang maitatag natin ang mga bagong komyun"

Salot ang Kontraktwalisasyon

SALOT ANG KONTRAKTWALISASYON
ni Gregorio V. Bituin Jr.
14 pantig bawat taludtod

kontraktwalisasyon ay salot sa manggagawa
kayod ng kayod habang sila'y kinakawawa
ng kapitalistang wala nang ibang magawa
kundi mga obrero'y kanilang pahirapan

kontraktwalisasyon ay salot na patakaran
pagkat manggagawa'y kanilang iniisahan
walang natatanggap na benepisyong anuman
limang buwan makalipas wala nang trabaho

obrero'y kayod ng kayod na parang kabayo
kapitalista'y tuwang-tuwa naman sa inyo
dahil limpak na tubo ang inaakyat ninyo
gayong natatanggap naman ay kaybabang sahod

ang kalagayan ng obrero'y halos hilahod
sa araw-araw na trabaho'y pagod na pagod
sa baba ng sweldo siya'y halos manikluhod
gayong di maregular ang mga tulad niya

simula nang pinauso ang bagong iskema
ang pagtatrabaho'y daraan na sa ahensya
kaya natatanggap ng obrero'y may bawas na
binabawasan pa ng ahensyang mapagpanggap

hustisya sa manggagawa'y dapat mahagilap
dapat kontraktwalisasyon ay duruging ganap
pagkat iskemang ito sa obrero'y pahirap
sa lakas ng obrero'y ito ang lumalamon

wala nang katiyakan sa kontraktwalisasyon
ngunit bakit pumapayag sa iskemang iyon
nilusaw pa nito ang karapatang mag-unyon
gayong tanging dala nito'y pagkadurog natin

limang buwan matapos trabaho'y hahanapin
saan na tayo maghahagilap ng pangkain
ang iskemang kontraktwalisasyon na'y durugin
kalagayang sa pagawaan ay dapat malutas

gawing iskema sa pagtatrabaho'y parehas
ayusin ang mga patakarang butas-butas
mga manggagawa'y gawing regular ang antas
may natatanggap na benepisyo't sweldong buo

panahon nang kontraktwalisasyon ay igupo
pagkat iskemang ito'y madaya't mapanduro
salot na kontraktwalisasyon ay dapat maglaho
upang tuluyang makinabang ang manggagawa

Maid in Manhattan

Maid in Manhattan
likhangisipnimona

Kay ganda ng Manhattan
Pangalawa kong tahanan
Naglalakihang establisimyento
Sentro ng kapitalismo
Nariyan ang Time Square
Gumuhong
Twin Tower
Statue of Liberty
At Park Avenue
Paraiso ng mga politiko
Ng mga gahaman
Sa Wall Street
Mundo ng burgesya
Primadona
Hari at reyna
Atletang sikat
Artistang maririkit
Diyus diyosan sa lupa
Para nasa langit



Buhay Amerika
Masarap nga ba?
Nagkukumahog
Araw gabi kumakayod
Kalabaw halintulad
May hilang suyod
Hindi alintana
Matinding pagod
Kumita lang ng dolyar
Sa mga baboy na busog
Me magagawa ba
Wala namang iba
Sa paglisan sa bansa
Kami ay pikit mata
Sardinas ba ako?
O tinapa?
Sinadya
Ng gobyerno
Murang ibenta
Sa buong mundo
Taga silbi
Taga punas uhog
Ng paslit
Taga hugas ng tae

Sa subway train
Iba iba
Itim, dilaw, may puti
Mayoroong kayumanggi
Asul na mata
Hikaw sa ilong
Tatoo sa braso
Uso o simbolo
Kulturang moderno
Sa kabila ng lahat
Kailangang mag ingat
Sa among abusado
Mata'y idilat
Diskriminasyon
Rasistang nagkalat
Mistulang hayop
Sa malamig na gubat
Tanging paraan
Ng gobyernong
Bingi
Sa karapatang pantao'y
Mga walang silbi
Sariling industriya
Isinantabi
Manggagawang Pinoy
Tinindang kamote

"likhangisipnimona"

Damayan Migrant Workers Association

Maso ang Nais Ko sa Puntod

MASO ANG NAIS KO SA PUNTOD
ni Gregorio V. Bituin Jr.
13 pantig bawat taludtod

maso, hindi kurus, ang nais ko sa puntod
pagkat ito'y tanda ng aking paglilingkod
sa uring manggagawang todo ang pagkayod
mabuhay lamang kahit kaybaba ng sahod

maso, hindi kurus sa puntod ang nais ko
pagkat ito'y tanda ng tangan kong prinsipyo
na lipunang ito'y lipunan ng obrero
di ng ganid na sistemang kapitalismo

maso ang nais ko sa puntod, hindi kurus
pagkat ito'y tandang naglingkod akong lubos
sa mga manggagawa't mamamayang kapos
upang sa araw-araw sila'y makaraos

maso't di kurus sa puntod ang aking nais
pagkat ito'y tanda ng prinsipyong malinis
hangad na sistema'y di maging labis-labis
at mapalitang tunay ang lipunang lihis