Timawa - Pataygutom o Malaya?

TIMAWA - PATAYGUTOM O MALAYA?

ang katanungan sa palaisipan: Dos Pababa

PATAY-GUTOM - anim na titik, ito'y ano kaya

KAWAWA, ALIPIN, ngunit sagot pala'y TIMAWA

gayong sa aralin noon, ang timawa'y MALAYA

nagbabago ang kahulugan ng mga salita

noon, ang timawa ay mga aliping lumaya

ngayon pag nanghingi ng limos, tawag na'y timawa

kahulugan nito'y nag-iba, paano't bakit nga

isang malaking tanong, nagbago nga ba ang wika?

o walang trabaho't kita ang aliping lumaya?

kaya nagpalaboy, sa lansangan gumala-gala?

naging gusgusin ang malaya ngunit walang-wala?

nakakatawa nga ba o tayo'y mapapaluha

ang pataygutom ay dating mga taong malaya

paano ba pumaimbulog ang mga kataga

sa pagdatal ng panahon, nagbago ng unawa

- gregoriovbituinjr.

03.31.2024

Pasasalamat (Grace Before Meals)

PASASALAMAT

(GRACE BEFORE MEALS)

tayo'y nasa harap nitong hapag-kainan

sabay nating bigkasin ang pasasalamat

sa mga naghanda ng pagkain ng bayan

sa mga nagtanim at nag-ani, salamat

salamat sa lahat ng mga magsasaka

mula binhi'y pinalago hanggang nag-uhay

silang sa lupang sakahan nakatali na

silang naglinang at nagpatubo ng palay

salamat sa lahat ng mga mangingisda

na nilalambat ang buhay sa karagatan

upang madala ang mga banyerang isda

sa pamilihan, at ating mabili naman

salamat sa lahat ng mga manggagawa

pagkain ay dinala sa bayan at lungsod

kay-agang gumising, kay-agang gumagawa

kayod ng kayod, kahit mababa ang sahod

salamat sa manggagawang tatay at nanay

na nagsikap upang pamilya'y mapakain

nang mga anak ay di magutom sa bahay

na para sa pamilya, lahat ay gagawin

salamat, binubuhay ninyo ang daigdig

uring manggagawa, hukbong mapagpalaya

kaya marapat lang tayo'y magkapitbisig

nang bulok na sistema'y tuluyang mawala

- gregoriovbituinjr.

03.31.2024

* mga larawan mula sa google

CHED official, inireklamo ng mga mag-aaral

CHED OFFICIAL, INIREKLAMO NG MGA MAG-AARAL

kaytinding ulat, aba'y ano na bang nangyayari?

CHED official, nireklamo ng mga estudyante

mula Our Lady of Fatima University

ang gobyerno sana'y di maging bulag, pipi't bingi

lumalabag daw sa pamantayan ng moralidad

ang nasabing opisyal na apelyido'y Darilag

kailangan daw paboran ng mga mag-aaral

ang umano'y kagustuhan ng nasabing opisyal

halimbawa ang reklamo ng MBA student

na nakumpleto naman daw ang pinasang requirement

subalit grading na incomplete ang binigay pa rin

reklamong pinarating sa tanggapan ni Bersamin

hiniling ng mga mag-aaral, tulad ni Guia

na ang nasabing opisyal ay imbestigahan na

lalo't may mag-aaral itong kinukursunada

nawa kamtin ng mga estudyante ang hustisya

- gregoriovbituinjr.

03.31.2024

* Bersamin - Executive Secretary

* ulat mula sa pahayagang Pilipino Star Ngayon, Marso 31, 2024, p.2

Tanong nila sa akin ngayong semana santa

TANONG NILA SA AKIN NGAYONG SEMANA SANTA

tanong nila, bakit di raw ako nagsimba?

bakit di rin sumama sa semana santa?

at bakit ba di rin nag-Bisita Iglesya?

bakit sa simbahan ay ayaw tumuntong na?

wala bang sinumang nagyayaya sa akin?

mga nabanggit ba'y kinatamarang gawin?

nasabi na noon, sasabihin ko pa rin

baka sa simbahan, isigaw: "Free Palestine!"

ayokong makinig sa paring nambobola

na animo'y lagi silang patay-malisya

lalo't pinupuri ang Israel sa misa

at di mabanggit ang nangyayari sa Gaza

wala akong bilib sa ganyang mga pari

patunay na burgesya'y kanilang kauri

tingin ko nga sa kanila'y mapagkunwari

bulag, pipi, at bingi silang di mawari

sabi nila, si Hesus ay hari ng Hudyo

inagaw ng Hudyo ang lupang Palestino

minamasaker pa ang mamamayan nito

tapos sasabihin nila, magsimba ako?

hanggang ngayon, akin iyang paninindigan

pag pinilt, isisigaw ko sa simbahan

"Free Palestine!" huwag nang magbulag-bulagan

magsigising kayo para sa katarungan!

- gregoriovbituinjr.

03.31.2024 (easter sunday)

* litrato mula sa google

Sudoku at Word Connect - Marso 2024

SUDOKU AT WORD CONNECT - MARSO 2024

natapos din ang isang buwang paglalaro

ng Sudoku at Word Connect sa aking selpon

nilalaro ko iyon ng buong pagsuyo

bilang pinakapahinga ko sa maghapon

sa Sudoku ay numero ang binubuo

na maaari namang palitan ng letra

sa Word Connect ay salita ang binubuo

sa wikang Ingles, mahahasa ka talaga

simpleng laro pag pahinga, simpleng libangan

sa kabila ng trabahong kayod kalabaw

nakakatulong maensayo ang isipan

matapos ang unos, lilitaw ang balangaw

minsan, kailangan talaga ng ganito

bilang pahinga sa mabigat na trabaho

- gregoriovbituinjr.

03.31.2024

Sa paggawa ng banghay

SA PAGGAWA NG BANGHAY

paano bang gagawin sa pagpaplano ng banghay

o ang pangkalahatang takbo ng isang salaysay

kapara'y mabait na pilotong puno ng husay

o dahil sa kabaitan, sa piloto'y nagpugay

samutsari ang paksa upang magawa ang kwento

dapat may pangunahing tauhan o bida rito

paglalarawan sa kalagayan ng mga tao

kapaligiran, kalikasan, suliranin dito

pag-isipan kung paano ba kwento'y sisimulan

at bakit ang paksang iyon ang nais ilarawan

paano ang daloy at pag-usad ng kwento't laban

paano nalutas ang matitinding tunggalian

bakit pangunahing tauhan ay di mapakali?

paano ilalarawan ang bawat insidente?

paanong ayos at pagkasunod ng pangyayari

mula bida, paanong masa ang naging bayani?

kung ako ang gagawa ng kwento, walang Superman

walang iisang taong puno ng kabayanihan

lagi't lagi ang bida'y kolektibong mamamayan

paano nga ba sila sama-samang nagtulungan

- gregoriovbituinjr.

03.31.2024

Isang madaling araw

ISANG MADALING ARAW

madaling araw, madilim pa ang paligid

tila ba aking mata'y may luha sa gilid

humahatak daw ako ng mahabang lubid

ng barko, ano ang mensahe nitong hatid

marahil, isa iyong planong paglalayag

nang hinila ang katig, may inihahayag

pirata'y paghandaan, paano pumalag

ang misyon ko'y paano sila malalansag

sagipin ang mga pasaherong babae

at tiyakin ding ligtas ang mga bagahe

ah, kailangang bumangon upang magkape

habang binting namitig ay minamasahe

nang biglang kung saan ay napatitig muli

sa barkong iyon, may babaeng naglilihi

manggang manibalang ang kanyang minimithi

habang kaharap ko'y piratang katunggali

saan ba kukuha ng manggang inaasam

gayong naroon sa gitna ng karagatan

marahil ay salmon ang hulihin ko na lang

ngunit katunggali'y naroong nakaharang

- gregoriovbituinjr.

03.31.2024

Palakasin ang pangangatawan

PALAKASIN ANG PANGANGATAWAN

palakasin ang pangangatawan

tangi itong kabilin-bilinan

ng aming matatanda sa bayan

pati na yaong nasa tubuhan

bawasan mo iyang matatamis

lalo na't katawan ay numipis

kanin ay huwag kumaing labis

magpalakas kahit na magtiis

di kailangan ang masasarap

kung katawan nama'y maghihirap

kung may sakit, paanong pangarap

na lipunang dahilan ng sikap

kung di susunod, mahahalata

sa katawan pag binalewala

ang payo ng mga matatanda

gayong tinutulungan ka na nga

- gregoriovbituinjr.

03.30.2024

Payak na hapunan

PAYAK NA HAPUNAN

bangus na inadobo sa toyo at suka

at ginayat na mga mumunting gulayin

kamatis, sibuyas, at dahon ng sibuyas 

na kaysarap ulamin kasama ng kanin

payak na hapunan ng tibak na Spartan

habang wala si misis sa aming tahanan

matapos magsulat ng akda'y naghapunan

kahit na nag-iisa lamang sa tahanan

bukod sa mumurahin, ito'y pampalusog

kain-bedyetaryan, kapara ko'y bubuyog

sa nektar ng bulaklak nagpapakabusog

upang maya-maya'y magpahinga't matulog

maraming salamat at muling nakadighay

habang naritong patuloy sa pagninilay

- gregoriovbituinjr.

03.30.2024

Hayaan mong tumula ako

HAYAAN MONG TUMULA AKO

hayaan mong tumula ako't inbox ay punuin

ngayon lang naman iyan, lahat ay matatapos din

pag ako'y di na makatula, o naging pasanin

kaya ginagawa ko ngayo'y ipagpaumanhin

hayaan mong tumula ako habang may hininga

ngayon lang naman iyan, habang narito't buhay pa

matatapos din ang lahat, kapag ako'y wala na

kung inis ka na'y humihingi ako ng pasensya

hayaan mong tumula ako matapos magnilay

o kaya'y matapos kong sunugin ang aking kilay

baka kasi may mapulot ka sa tula kong tulay

patungong ibang daigdig na aking malalakbay

hayaan mong tumula ako, nais lang maghandog

ng katha sa sambayanan, lipunan, uri't irog

tila baga ako'y makatang kapara'y bubuyog

na laksang bulaklak, isyu't paksa ang pinupupog

- gregoriovbituinjr.

03.30.2024

* maraming salamat sa kasamang kumuha ng litrato

4PH ay hagupit na kaylupit

4PH AY HAGUPIT NA KAYLUPIT

ang pabahay ay huwag ibatay sa market value
kundi sa capacity to pay nitong maralita
ang pabahay ay serbisyo, huwag gawing negosyo
ito'y isang katotohanang dapat maunawa

ang 4PH daw ay pang-ISF, o pang-iskwater
ngunit hindi pala, dapat mayroon kang Pag-Ibig
binago na ang squatter, ngayon informal settler
families, kahulugang pinaganda sa pandinig

isang informal worker nga ang umamin nang tunay
wala siyang regular na sahod, kaya ang sabi:
"Hindi ko kayang bayaran ang presyo ng pabahay
ng DHSUD-4PH", kaydali nating maintindi

sino bang maralitang isang kahig, isang tuka
na sadyang gipit ang magbabayad ng isang yunit
na halaga'y higit sangmilyon, mayroon ba? wala!
4PH sa maralita'y hagupit na kaylupit

kaya di pangmaralita ang 4PH na iyan
pabahay ng gobyerno'y isang negosyo talaga
presyo ng pabahay ay ibatay sa kakayahan
at di sa market value, bilang serbisyo sa masa

- gregoriovbituinjr.
03.30.2024

* 4PH - Pambansang Pabahay para sa Pilipino Program ng pamahalaang BBM
* litratong kuha ng makatang gala sa isang rali sa harap ng tanggapan ng DHSUD, 09.11.2023

Manpower agencies, linta sa manggagawa! Buwagin!

MANPOWER AGENCIES, LINTA SA MANGGAGAWA! BUWAGIN!

sinabi nga ng kumandidatong senador noon

iyang mga manpower agencies ay mga linta

nagpapasarap sa iskemang kontraktwalisasyon

sinisipsip ang pawis at dugo ng manggagawa

dapat silang buwagin, kaya pag ako'y nanalo

matatapos na ang maliligayang araw nila

sapol na sapol sa panawagan niyang totoo

na mga manpower agencies ay linta talaga

sa Kalbaryo ng Maralita'y aming panawagan

na inilagay sa kurus upang maipabatid

sa madla iyang ginagawa nilang kamalian

oo, dapat silang buwagin pagkat di matuwid

pagsasamantala sa obrero'y dapat tapusin!

lintang manpower agencies na'y tuluyang buwagin!

- gregoriovbituinjr.

03.30.2024

* litratong kuha ng makatang gala mula sa Kalbaryo ng Maralita, Marso 26, 2024

Pag-ingatan ang sunog

PAG-INGATAN ANG SUNOG

minsan, nag-aapoy ang pandama
na para bagang nilalagnat ka
o kaya'y libog na libog ka na
init na init ka na talaga

huwag kang maglalaro ng apoy
bilin ni nanay nang ako'y totoy
lalo't kandila'y nangunguluntoy
tubig ay ihanda mong isaboy

karaniwan ang sunog sa atin
ulat nga'y di ka na gugulatin
balita sa dyaryo kung basahin
ay sadyang masakit sa damdamin

sa paligid mo'y maging matunog
alisto nang puso'y di madurog
huwag mong kayaang magkasunog
kundi baka araw mo'y lumubog

- gregoriovbituinjr.
03.29.2024

* litrato mula sa app game na Word Connect

Karapatan sa Kabuhayan, Ipaglaban!

KARAPATAN SA KABUHAYAN, IPAGLABAN!

iyan ang mensahe sa damit niya
marahil siya'y isang manininda
pinanawagang karapatan nila
sa kabuhayan, igalang talaga

ang mga vendor ay huwag gipitin
silang marangal, huwag maliitin
silang patas sa maraming usapin
upang pamilya'y kanilang buhayin

karapatan nila sa kabuhayan
ay sama-samang ipinaglalaban
bawat sentimo'y pinagsisikapan
upang anumang kita'y ipuhunan

manininda'y totoong kumakayod
gayong munting kita'y di naman sahod
sa pamilya'y katuwang at gulugod
silang sa madla'y tunay kung maglingkod

ating dinggin ang panawagang ito
buhay na letra't mensaheng totoo
sa manininda, kami po'y saludo
taas-noo't marangal magtrabaho

- gregoriovbituinjr.
03.29.2024

* litratong kuha ng makatang gala sa rali sa Kongreso laban sa ChaCha, Marso 20, 2024

Oubaitori at Obituary

OUBAITORI AT OBITUARY

anong kaibhan ng oubaitori at obituary

nang mapakinggan ko ito'y di ako mapakali

hinanap ko ang kahulugan ng mga nasabi

mabuti't nasaliksik kaya ako'y di nagsisi

ang oubaitori pala'y Hapones na kaisipan

tulad ng bulaklak, ang tao'y lalago rin naman

sa sarili nilang panahon at pamamaraan

tulad ng ibang ispesyi, ito ma'y karaniwan

ang obituary naman ay matagal ko nang batid

na talaan ng sa huling hantungan ihahatid

minsan sa indayog ng salita'y nasasalabid

oubaitori, obituary, huwag tayong maumid

maraming salitang pag narinig, magkakatugma

subalit iba pala ang kahulugan at dila

ang mahalaga palagi ang ito'y maunawa

upang di maligaw at baka sa daan mawala

- gregoriovbituinjr.

03.29.2024

Kayraming maka-Diyos ang di makatao

KAYRAMING MAKA-DIYOS ANG DI MAKATAO

mas nais kong magsulat kaysa sundin sila

sa tradisyon nila tuwing semana santa

tangi kong nagawa'y magsulat ng pabasa

para sa rali ng dalita sa Mendiola

kayraming maka-Diyos ang di makatao

kapitalistang inaapi ang obrero

elitistang palasimba subalit tuso

sa obrero'y walang paki, una'y negosyo

oo, di man lang nila itaas ang sahod

ng manggagawang araw-gabing kumakayod

tubo muna, obrero man ay manikluhod

pati batas ay kanilang pinipilantod

pang-ISF daw ang 4PH, bukambibig

ng gobyerno, na madalas nating marinig

ngunit etsapwera ka kung walang Pag-Ibig

pambobola nila'y dapat nating mausig

palasimba kahit pangulong maka-Diyos

na sa EJK umano'y siyang nag-utos

sa ChaCha, bansa'y binubuyangyang ng lubos

binebenta sa dayo ang bayang hikahos

sa kanila, ang semana santa'y bakasyon

silang nagtaguyod ng kontraktwalisasyon

kaya di ako lumalahok sa tradisyon

buti kung patungo iyan sa rebolusyon

- gregoriovbituinjr.

03.29.2024

* ISF - informal settler families, bagong tawag sa iskwater

* 4PH - Pambansang Pabahay para sa Pilipino Program

* EJK - extrajudicial killings

Hindi pa laos si idol

HINDI PA LAOS SI IDOL

isang MMA fighter si Eduard Folayang
na ilang beses nang nagwagi sa labanan
nais niyang bumalik at lumaban sa ONE
Championship at muli ay makipagbangasan

kung si Pacquiao sa boksing, siya'y sa MMA
kung si Efren sa bilyar, siya'y sa MMA
kung si Alex sa tennis, siya'y sa MMA
siya'y pang-Mixed Martial Arts, idol sa MMA

maraming taon na rin ang iyong ginugol
upang kampyonato'y makuha mo't mahabol
maging matatag ka lagi sa laban, idol
patalasin ang bangis upang di pumurol

muli, sa laban mo, kami'y nakasubaybay
ipakitang di ka pa laos, pagpupugay!

- gregoriovbituinjr.
03.29.2024

* ulat mula sa pahayagang Remate, Marso 21, 2024, pahina 12

Marso 29, sa kaarawan ng kapatid ko't pamangkin

MARSO 29, SA KAARAWAN NG KAPATID KO'T PAMANGKIN

sabay ang kaarawan ng kapatid ko't pamangkin

"Happy birthday!" sa dalawang mahal ko't magigiting

"Maligayang Kaarawan!" sa inyo'y bumabati

nawa'y wala kayong sakit at malusog palagi

tulad pa rin ng aking sinasabi karaniwan

palagi kayong mag-ingat lalo ang kalusugan

di ko man kayo madalaw sa malayong probinsya

taospuso yaring pagbati't pagpapahalaga

Happy birthday, Jojo, Twinkle, pagpupugay sa inyo

pagkat inyong pamilya'y inalagaang totoo

bawat problema'y may solusyon, at di laging tiis

kayo'y matatag, 'Happy birthday!" sabi rin ni misis

habang ako'y narito't kinakathang tula'y tulay

upang mapitas ang mangga at nagtubuang uhay

ako pa rin naman sa inyo'y di nakalilimot

basta ako'y narito lang, madali n'yong maabot

- gregoriovbituinjr.

03.29.2024

* litratong cake mula kay google

Sa tumatangkilik sa Taliba ng Maralita

SA TUMATANGKILIK SA TALIBA NG MARALITA

kami'y taospusong nagpapasalamat talaga

sa tumatangkilik sa Taliba ng Maralitâ,

ang publikasyon ng Kongreso ng Pagkakaisa

ng Maralitang Lungsod, ang pahayagan ng dukhâ

sa loob ng dalawang linggo nakapaglalabas

ng isyu't balita hinggil sa laban nitong bayan

4PH, pabahay, sahod, ChaCha ng talipandas

kwento't mga tula, kolum ni Pangulong Kokoy Gan

patnugutan ay narito't tuloy sa pagsisilbi

sa maralita upang makamit ang ating layon

mulatin at pakilusin ang dukha, di lang rali

kundi matutong ipaglaban ang hustisyang misyon

ipabatid bakit dapat baguhin ang sistema

na siyang dahilan ng naranasang dusa't hirap

ang Taliba ng Maralita'y kanilang sandata

tungo sa pagtayo ng lipunan nilang pangarap

- gregoriovbituinjr.

03.29.2024

Sa pagitan ng tsaa't taludtod

SA PAGITAN NG TSAA'T TALUDTOD

sa pagitan ng tsaa't taludtod

ay nagagawa ko pang isahod

ang libog, dusa, lumbay, hilahod

kung di lang nadulas sa alulod

lilikhain ko pa rin ang langit

sa gitna ng nadaramang init

pagkakatha'y nais bumunghalit

damang may ngiti sa bawat saglit

di agad tanaw ang kabulukan

dahil sa ningning nila't kariktan

makintab sa labas pag tiningnan

ngunit uod ang kaibuturan

ganyan din iyang sistemang bulok

mapagsamantala'y nasa rurok

tiyan ng kapitalista'y umbok

mula burgesya ang nakaluklok

- gregoriovbituinjr.

03.28.2024

Tahong at talong

TAHONG AT TALONG

mula palengke, tahong muna'y hinalabos

hinugasan at binabad ito sa tubig

na maligamgam saka hinanda ang talbos

luya, bawang, sibuyas, kawali sa gilid

tanghali iyon, ngayong gabi iniluto

di napuna sa dami ng gawaing bahay

na gabi na pala, ramdam ko'y narahuyo

sa pagsusulat, pagtula at pagninilay

nagpahinga at muntik na ring makatulog

inihanda na ang kawali pagkat gutom

una ko munang ginisa ang mga sahog

saka nilagay ang luya, talong at tahong

naglagay ng tubig at asin, nagpasabaw

nilagyan ng talbos at dahon ng sibuyas

pinakulo, sa sarap ako'y napahiyaw

O, misis ko, tila ba ako na'y lalakas

- gregoriovbituinjr.

03.28.2024

Nakapikit

NAKAPIKIT

"Paano ka ba matulog?"  tanong sa akin minsan

"Nakapikit." ang payak kong tugon sa katanungan

wala lang, iyon ay basta natanong sa inuman

ang tanong pala'y kung ako'y magkukumot at unan

sa akin, saanman mapasandal, nakakaidlip

may banig o kama, may kumot o wala, pipikit

saanman mapunta, ganyang tanong ay di malirip

di naman paimportante, kung antok na'y pipikit

di ko na problema ang banig o magarbong kama

nakaupo, nakahiga, o nasa sasakyan pa

basta inantok, ako'y pipikit na lang talaga

liban kung nasa labas, seguridad ay taya na

may kasabihan nga tayo, "kung maigsi ang kumot

ay huwag munang mag-umunat, kundi bumaluktot"

pagtulog ay di problema, saanman mapasuot

pipikit na lang pag inantok o kaya'y nanlambot

- gregoriovbituinjr.

03.28.2024

Freindship ba o Friendship?

FREINDSHIP BA O FRIENDSHIP?

typo error agad sa mata ko'y nahagip

sa bilihan ng aklat habang nag-iisip

ang awtor: Jane Austen; ang aklat: Love and Freindship

di ba't ang wastong pagbaybay niyon ay Friendship?

editor ba'y pabaya't di nakitang tunay

marahil sa kanila'y ganyan ang pagbaybay

pagkat sa Wikipedia sa akin sumilay

titulo'y Love and Freindship pag binasang tunay

di iyon typo error, ipagpalagay na

parang labor sa US, labour sa Britanya

ang break at ang brake, magkatunog, magkaiba

ang spelling sa isa ay iba sa iba

ang Love and Freindship kaya'y magandang basahin

sa pamagat pa lang, baka ika'y kiligin

Pag-ibig at Pagkakaibigan ang salin

salitang ugat ay IBIG kung nanamnamin

- gregoriovbituinjr.

03.28.2024

* litratong kuha ng makatang gala sa isang estante ng bilihan ng aklat

Gas hydrate, natuklasan sa Manila Trench

GAS HYDRATE, NATUKLASAN SA MANILA TRENCH

nadiskubre ng mga geolohista ng UP

doon sa Manila Trench ang posibleng deposito

ng gas hydrate bilang isang alternative energy

resource na sa paglaon magagamit na totoo

parang yelo raw ito sa sahig ng karagatan

na mababa pa sa freezing point ang temperatura

dami ng karbon nito'y dalawang beses ang laman

na "potentially viable power source" din daw pala

taga-College of Science silang sound waves ang ginamit

upang matukoy sa mapa ang seismic reflection

ng gas hydrate, mga nagsaliksik ito ang sambit,

na tinawag nilang bottom simulating reflectors

nasa mahigit labinlimang square kilometer

sinlaki ng isla ng Palawan ang naturang trench

na laman nga'y gas hydrate, ayon sa mga researcher

ay, kaylaking deposito nito sa Manila Trench

abot dalawandaan hanggang limangdaang metro

ang lalim ng seafloor, batay sa kanilang pagtaya

subalit nagbigay babala rin ang mga ito

dahil sa geological, environmental threat nga

ang natutunaw na gas hydrate ay baka magdulot

ng seafloor disturbance na maaaring magresulta

sa tsunami't underwater landslide, nakakatakot

pati rin daw carbon at methane ay apektado pa

nagsasagawa na ng dagdag pang imbestigasyon

sa ibang offshore sa ating bansa, anang balita

gayunman, natuklasan nila'y pag-aralan ngayon

upang sa hinaharap ay di tayo mabulaga

- gregoriovbituinjr.

03.28.2024

* balita mula sa pahayagang Abante, Marso 15, 2024, p.8

Paglipol ang esensya ng ChaCha nila

PAGLIPOL ANG ESENSYA NG CHACHA NILA

sandaang porsyentong aariing sadya

ang kalupaan ng bansang dapat malaya

ang nais nila tayo'y mawalan ng mukha

manatiling iswater sa sariling bansa

nais nilang distrungkahin ang Konstitusyon

political dynasty ay tanggalin doon

nukleyar pa'y nagbabantang payagan ngayon

bukod pa sa pangarap nilang term extension

mag-aaring sandaang porsyento ang dayo

lupa, tubig, kuryente, serbisyo publiko

iskwater ay gagawing sandaang porsyento

sa ngalan ng dayo, nalilipol na tayo

dayuhang edukasyon ay papayagan na

ito'y gusto raw ng mga kapitalista

na susunod na manggagawa'y maeduka

upang sa dayo'y magpaalipin talaga

pinapirma para sa ayuda ang madla

na nasa likod pala'y ChaCha ng kuhila

balak ng ChaCha nila'y malipol ang dukha

na dignidad ng tao'y binabalewala

dapat pagkain sa mesa, hindi Charter Change

dapat disenteng pabahay, hindi Charter Change

dapat trabahong regular, hindi Charter Change

walang kontraktwalisasyon, hindi Charter Change

buwagin na ang lintang manpower agencies

na sa obrero'y sumipsip ng dugo't pawis

dapat ding tugunan muna ang climate crisis

hindi Charter Change ng mga mapagmalabis

- gregoriovbituinjr.

03.28.2024

* litratong kuha ng makatang gala sa UST bago magsimula ang Kalbaryo ng Maralita, Marso 26,2024

Hustisya sa mga desaparesido

HUSTISYA SA MGA DESAPARESIDO

kayraming nangawalang may mga pangalan

ngunit katawan ay di pa natatagpuan

ang hiyaw ng pamilya nila'y katarungan!

ang kanilang mahal sa buhay ba'y nasaan?

umano'y dinukot dahil daw aktibista

na naglilingkod ng buong puso sa masa

na nais baguhin ang bulok na sistema

na asam kamtin ay panlipunang hustisya

mabuhay kayong mga desaparesido

kumilos para sa bayan, kami'y saludo

na inorganisa'y magsasaka't obrero

upang itayo ang lipunang makatao

nawa bangkay ninyo'y matagpuan pa namin

nang mabigyan kayo ng marangal na libing

nang mga maysala'y talagang panagutin

nang hustisya para sa inyo'y makamtan din

- gregoriovbituinjr.

03.28.2024

* litratong kuha sa Bantayog ng mga Bayani

Bulong sa hangin

BULONG SA HANGIN

sa hangin ako'y may ibinulong

habang nilalantakan ang tutong

na nilagay sa platong malukong

bakit ba ulam ko'y okra't talong

na isinawsaw ko sa bagoong

sa hangin ay aking ibinulong

habang nakatalungko sa silong

lipunang asam ay sinusulong

sistemang bulok nakabuburyong

kung sa kapitalismo hahantong

ang masa'y tinuturing na gunggong

sa kapitalismo ng ulupong!

masa ba'y kanino pa kakandong?

at kanino hihingi ng tulong?

sa bituka, may rebong karugtong!

- gregoriovbituinjr.

03.27.2024

Tarang magtsaa

TARANG MAGTSAA 

tarang magtsaa ng malunggay

habang naritong nagninilay

pampalusog at pampatibay

nitong katawan at ng hanay

minsan kailangan talaga

sa hapon, gabi o umaga

pampasarap ng ating lasa

animo'y salabat o luya

habang aking ikinukwento

bakit ba may aping obrero

bakit ba negosyante'y tuso

at sistema'y kapitalismo

sa Kalbaryo ng Maralita

bakit dukha'y kinakawawa

nitong sistema ng kuhila

dukha'y kailan giginhawa

- gregoriovbituinjr.

03.27.2024

4PH sa kalbaryong kurus

4PH SA KALBARYONG KURUS

sakto ang nakalagay sa kurus

na dukha'y nililinlang nang lubos

4PH nilang alok ay peke

ito'y para sa kapitalista

at hindi para sa maralita

huwag ibatay sa market value

ang pabahay na alok na ito

ibatay sa capacity to pay

o capacity to buy ng dukha

ang presyo ng bahay ng dalita

- gregoriovbituinjr.

03.27.2024

* litratong kuha ng makatang gala sa Kalbaryo ng Maralita sa Morayta, Maynila, umaga ng Marso 26, 2024

* kurus at hindi krus ang pagsulat ng mga makata noon, tulad nina Jose Corazon de Jesus, Ildefonso Santos

Imbes Malakanyang, rali ay sa FEU na

IMBES MALAKANYANG, RALI AY SA FEU NA

pasensya na po't inyong iskul ay nabanggit

sa inyong tapat kami nagrali't naggiit

ng aming karapatan dahil sa malupit

na sistema, na isyu sana'y mailapit

isyung nais naming sa Mendiola masambit

sa FEU na, dapat ay sa Malakanyang

pagkat doon ang trono ng pamahalaan

karapatang magpahayag na'y binawalan

sa Mendiola gayong doon marapat lamang

batalyong pulis ang sa amin ay humarang

Kalbaryo ng Maralita'y isinagawa

upang iparating isyu ng maralita

ang 4PH ay para sa negosyong sadya

pabahay na alok na di para sa dukha

sa ChaChang nais nila, bayan ang kawawa

payag ba kayong gawing sandaang porsyento

na dayuhan ay mag-ari ng lupa rito

midya, kuryente, tubig, serbisyo publiko

ChaCha ang paraan ng Senado't Kongreso

upang Saligang Batas natin ay mabago

paumanhin, FEU, kung maging madalas

sa inyo idulog ang sistemang di patas

pagrarali namin sa harap nyo'y dadalas

kung hindi titino ang tuso't talipandas

kung bayan na'y binebenta ng mga hudas

nais ng maralita'y lipunang parehas

- gregoriovbituinjr.

03.27.2024

* litratong kuha ng makatang gala sa harap ng FEU sa Morayta nang isinagawa ang Kalbaryo ng Maralita, umaga ng Marso 26, 2024

Maralita, hinarangan ng pulis sa rali

MARALITA, HINARANGAN NG PULIS SA RALI

nais lamang naming magpahayag

subalit pulis na'y nagsiharang

ang maralita't di nagpatinag

sa harap ng mga nakaabang

imbes makarating sa Mendiola

iparinig ang daing ng madla

ay hanggang doon lang sa Morayta

nagprograma't nakapagsalita

inihatid na lang sa FEU

marahil sa estudyante't guro

ang marami naming dalang isyu

parang bigas, pangakong pinako

tarangkahan ng pamahalaan

dapat ang mga isyu'y dulugan

gobyerno ba'y kinatatakutan

ang sarili niyang mamamayan?

- gregoriovbituinjr.

03.27.2024

* litratong kuha ng makatang gala sa pagkilos na "Kalbaryo ng Maralita",  umaga ng Marso 26, 2024

Kalbaryo ng Maralita

KALBARYO NG MARALITA

kanina, aming isinagawa

itong Kalbaryo ng Maralita

sa Mendiola kami patutungo

sa Morayta hinarangang buo

ng mga pulis ang maralita

sa Morayta na lang nagsalita

mga maralita'y di nasindak

kahit sangkaterba pa ang parak

isyu sana'y nais iparinig

sa Malakanyang at mga kabig

imbes Malakanyang, sa FEU

hinaing ay pinarinig dito

trabaho't pabahay, hindi ChaCha

ang 4PH ay hindi pangmasa

ang manpower agencies na linta

ay marapat nang buwaging sadya

tuloy ang pagtaas ng bilihin

at di mabayaran ang bayarin

sa lowcost housing at relokasyon

may banta pa rin ng demolisyon

dito'y aming mga panawagan

ChaCha ay ilantad at tutulan

ang krisis sa kabuhayan, klima

at karapatan ay wakasan na

4PH ay di pangmaralita

kaya isinusumpa ng dukha

4PH ay pangkapitalista

kaya dapat itong ibasura

di payag na sandaang porsyento

lupain ay ariin ng dayo

ang iskwater sa sariling bayan

ay di na dapat pang madagdagan

patuloy na nadaramang sadya

itong Kalbaryo ng Maralita

kailan ba giginhawa sila?

pag sistemang bulok, nabago na?

- gregoriovbituinjr.

03.26.2024

* ang litrato'y kuha ng makatang gala sa Kalbaryo ng Maralita, sa tapat ng UST bago magmartsa patungong Mendiola, Marso 26, 2024

Pabasa 2024

PABASA 2024

para sa Kalbaryo ng Maralita

4PH pala'y negosyo

para sa ating gobyerno

kung di matatag ang sweldo

ay di ka puwede rito

4PH nila'y negosyo

para sa iskwater iyon

iniba ang depinisyon

para sa ISF ngayon

kung walang pambayad doon

ay di ka puwede roon

manggagawa'y nagtitiis

maging kontraktwal ng labis

habang manpower agencies

na linta sa manggagawa

ay laging nakabungisngis

presyo ng mga bilihin

pataas ng pataas din

aba'y dapat repasuhin

nitong Kongreso't Senado

ang wage fixing mechanism

iyang RA 9507

kondonasyon, restructuring

pahirap sa lowcost housing

pag di bayad ang bayarin

agad kang palalayasin

ang ChaCha ay panlilinlang

na naman sa mamamayan

ibebenta sa dayuhan

itong ating kalupaan

negosyo'y lalong yayaman

sandaang porsyentong lupa

aariin ng dayuhan

iyan ang nais ng ChaCha

iskwater sa ating bayan

lalong walang matitirhan

ang RA 9507

at 4PH, IBASURA

ibasura rin ang ChaCha

nais naming maralita

ay makataong sistema

- gregoriovbituinjr.

03.25.2024

* inihanda upang gamitin sa aktibidad na "Kalbaryo ng Maralita" mula UST España tungong Mendiola, Maynila, umaga ng Marso 26, 2024

Itutulog ko na lang muna

ITUTULOG KO NA LANG MUNA

itutulog ko na lang ba itong hinaing?

bakasakaling mawala kapag nagising?

malulutas ba ito habang nahihimbing?

tandang dapat nang matulog ang paghihikab

at nais ko nang matulog katabi si Lab

nais magsulat ngunit antok na'y nanunggab

itutulog ko muna ang maraming paksa

itutulog ko muna ang aking pagluha

itutuloy na lang bukas ang ginagawa

diwata'y nais kong makasama sa ulap

habang nagpapalitan ng mga hinagap,

ng mga taludtod, talulot, pangungusap

ay, di muna tutula, ako'y tutulog na

pagkat paglalakbay ko'y mahaba-haba pa

at bukas na lamang muli tayong magkita

- gregoriovbituinjr.

03.24.2024

* dibuho mula sa google

Meryenda muna

MERYENDA MUNA

ako muna'y magmemeryenda

katatapos ko lang maglaba

pinigaan at sinampay na

at bukas naman magpaplantsa

tarang magkape't magtinapay

habang pahinga't nagninilay

tarang pagsaluhan ang monay

habang isip ay naglalakbay

tapos maglalampaso naman

bawat sahig ay pupunasan

pag linggo'y ganyan kadalasan

walang pahinga sa tahanan

simple lang ang meryenda ngayon

kape't monay lang ang nilamon

subalit di gaya kahapon

na nabitin sa pansit kanton

- gregoriovbituinjr.

03.24.2024

Pangarap

PANGARAP 

pangarap ko'y lipunang makatao

ay maitayo ng uring obrero

walang pagsasamantala ng tao

sa tao, habang tangan ang prinsipyo

pangarap ko'y lipunang manggagawa

kung saan walang naapi't kawawa

lakas-paggawa'y binayarang tama

at di kontraktwal ang nasa paggawa

pangarap ko'y lipunang walang hari

walang tuso, kapitalista't pari

pangarap makapagtanim ng binhi

na ibubunga'y pantay, walang uri

pangarap ko'y makataong lipunan

na kung kikilos ay baka makamtan

- gregoriovbituinjr.

03.24.2024    

Pamasahe

PAMASAHE

nais kong magpamasahe

at ako'y sumakay ng dyip

trese na ang pamasahe

ay di ko pa rin malirip

onse kapag estudyante

pidabalyudi at senyor

bente porsyento'y nalibre

subalit hindi ang mayor

basta batang nakaupo

ay may bayad ding talaga

ngunit libre pag pinangko

ng kanyang butihing ina

nang dumating kay mamasan

ay nagpamasahe ako

pakiramdam ko'y gumaan

mula paa hanggang ulo

- gregoriovbituinjr.

03.23.2024

Diskarte

DISKARTE

akala'y lagi akong wala sa sarili

na kung ano-ano na lang ang sinasabi

laging abala, nagmamadali sa gabi

nang naisip na talinghaga'y maitabi

lalo na't kayrami ng isyu't pangyayari

na ang dama ng loob ay di mapakali

tutunganga sa kawalan at atubili

di maialay ang tula sa binibini

tanong nila, tula mo ba'y saan binase

sagot ko, sa danas ng dusa, luga't peste

nilay sa paglakad nang walang pamasahe

lalo't madalas pang makaapak ng tae

may naging katoto nga akong anluwage

sa kalaunan ay aking naging kumpare

mabait sa una, ngunit naging salbahe

nang ako'y gustuhin ng crush niyang babae

sa baba, mga isyu'y inalam kong pirmi

na layon ay makapag-organisa kami 

tulungan ang masang sa isyu'y napipipi

at katukin ang gobyernong di naman bingi

- gregoriovbituinjr.

03.23.2024

Nawala na ang Book Sale sa MC Square

NAWALA NA ANG BOOK SALE SA MC SQUARE

sa Malabon City Square, ang Book Sale na'y nawala

nagsara na ang kaytagal kong pinuntahang sadya

dahil sa mga aklat doong sadyang pambihira

nalugi na ba? paano ang mga manggagawa?

matapos manggaling sa S.M.-ZOTO sa Tomana

dalawang kilometrong lakad ay sisimulan na

di muna uuwi, sa Book Sale ay tatambay muna

at baka may mabiling librong kursunada't mura

subalit nagsara na ang Book Sale na naroroon

na para bang may dambuhalang sa kanya'y lumamon

at mga aklat ay nginata at sadyang nilulon

nakahihinayang ang doo'y danas na kahapon

gayunman, may iba pang Book Sale na sangay ng aklat

sa Cubao ay may dalawang madadalaw kong sukat

O, Book Sale, sa iyo'y taospusong pasasalamat

nagsara man doon, sa iyo'y may nabiling aklat

- gregoriovbituinjr.

03.22.2024

Kalbaryo ng Maralita sa Mayaman St.

KALBARYO NG MARALITA SA MAYAMAN ST.

dumaan sa Daang Mayaman
ang Kalbaryo ng Maralita
kung saan aking dinaluhan
upang makiisa ngang sadya

mula Housing ay nag-Philcoa
sa Daang Masaya lumiko
at sa Mayaman nangalsada
at sa DHSUD kami patungo

nilantad ang sistemang bulok
ng kagawaran sa pabahay
umano'y negosyo ang tutok
kaya dukha'y di mapalagay

nawa ay kanilang makamit
ang karapatang ginigiit

- gregoriovbituinjr.
03.22.2024

* litratong kuha ng makatang gala sa kanto ng Mayaman St. at Kalayaan Avenue sa Lungsod Quezon, Marso 22, 2024

Hustisya para kay Killua!

HUSTISYA PARA KAY KILLUA!

pinaslang ang asong si Killua

naluha ang ilan sa artista

extremely heartbreaking, ani Sarah

kaysakit nito, ani Janella

anang ulat, nang aso'y pinaslang

ay sa sako natagpuan na lang

sino kaya ang may kagagawan?

tila may galit sa asong iyan!

kung pinatay siya't isinako

di siya pulutan ng lasenggo

at di kinatay o inadobo

ngunit bakit kinitil ang aso?

dahil ba ngalang Killua'y may Kill?

kaya buhay ng aso'y kinitil?

katukayo niya'y isang hunter

sa palabas na Hunter x Hunter

aso man, hayop ay may buhay din

kapara ng taong may damdamin

kaya ako'y nananawagan din

ng katarungan na sana'y kamtin

- gregoriovbituinjr.

03.22.2024

* litrato ni Sarah Geronimo mula sa pahayagang Bandera, ni Janella Salvador sa Abante, at aklat na Animal Scene, Volume 23, na nabili ng makatang gala

Nais kong magbigay-tinig

NAIS KONG MAGBIGAY-TINIG

bilang tibak, nais kong bigyang tinig

ang maralitang animo'y nabikig

ang mga api't winalan ng tinig

ang pinagsamantalaha't ligalig

nilalayon ko bilang maglulupa

ang sila'y aking makasalamuha

at sa isyu sila'y mapagsalita

nang karapata'y ipaglabang sadya

bilang makata, aking inaalay

ang aking mga tula't pagsasanay

upang tinig ng dukha'y bigyang buhay

pagkat bawat tula'y kanilang tulay

tungo sa isang bayang makatao

sa lipunang ang palakad ay wasto

sa bansang di sila inaabuso

sa sistemang patas at di magulo

sa ganyan, buhay ko'y nakalaan na

ang bigyang tinig ang kawawa't masa

hustisya'y kamtin at pakinggan sila

ang baguhin ang bulok na sistema

- gregoriovbituinjr.

03.22.2024

* litrato ay notbuk ng makatang gala