matapos kunan ng dugo'y bumili ng halaan
upang siya kong iluto't maging pananghalian
na sinahugan ng talbos, sibuyas, luya't bawang
ayos na ang buto-buto, anong sarap ng ulam
dinamihan ng tubig at nagsabaw ng di labis
katamtaman lang, habang nilulutong walang mintis
nilagyan man ng asin, sabaw ay manamis-namis
sapat lang sa kalusugan ng katawang manipis
tama lang pala ito matapos kunan ng dugo
kaya humigop muna ng sabaw bago sumubo
habang kumakain ng halaan ay napagtanto
na saanman ang labanan ay di dapat sumuko
parang nasa digmaan ang kanina'y paghahanda
nasa parang ng digmaang hinanda'y puso't diwa
matapos kunan ng dugo, sabaw yaong tinungga
tila medalya ng tagumpay ang natamong pala
- gregoriovbituinjr.
08.14.2021
Walang komento:
Mag-post ng isang Komento