O LAKAS NG PAGKAKAISA
ni Julian Kasamahan
(Oktubre 15, 2009, nakatakda ang spin-off na pansamantalang hindi ipinatupad at nananatiling banta pa rin sa ilang libong manggagawa ng Philippine Air Lines. Sa kasalukuyan ay patuloy na nagbubuo ng mga konseho bawat departamento para paghandaan ang kinakaharap na banta.)
Spin-off ang sa PAL Management
Sa Union Leaders, Bargaining Agreement
Tila walang pagkakasunduan
O sadyang palabas lamang!
Sarsuwelang nagaganap
Lubhang nakakabagabag
Manggagawa'y nabulabog
At halos di makatulog!
Nang dahil sa takot
Nabahag ang buntot
Di bale nang walang umento
Basta't may trabaho!
Isang malaking kabuktutan
At huwag nating papayagan
Ating kakayanan ay maliitin
Uri at pagkatao ay libakin!
Tumindig sa sariling mga paa
Mag-isip, kumilos baka mahuli pa
Konseho sa departamento'y pagyamanin
Maliliit na pulong ating pagsama-samahin!
Aktibo man o nasa katahimikan
Nagmamatyag o nagsusuri man
Alam ang kagalingan at karapatan
Sa iisang lakas ating bigyang daan!
Ating ipagtanggol at depensahan
Trabaho't benepisyo sa kasiguruhan
Iba't ibang kapanig, dapat mag-analisa
Araling mabuti... sino nga ba sa kanila!
Sulong, mga kapatid, mga kasama
Sa iisang lakas tayo'y magkaisa
Maging kritikal, kumilos, magsalita
Kapakanan ng manggagawa, ating ibandila!
* Si Julian Kasamahan ay manggagawa at kasapi ng unyon sa PAL
Walang komento:
Mag-post ng isang Komento